چینی وزارت خارجہ نے مشرق وسطیٰ میں جاری کشیدگی کے پیش نظر شدید خدشات کا اظہار کرتے ہوئے خبردار کیا ہے کہ اگر فوری اقدامات نہ کیے گئے تو جنگ پورے خطے میں پھیل سکتی ہے۔ چینی وزارت خارجہ کے ترجمان نے ایک بیان میں کہا ہے کہ جنگ کے پھیلاؤ کو ہر صورت روکا جانا چاہیے اور تمام فریقین کو فوری طور پر سیاسی حل کی جانب واپس آنا چاہیے۔

ترجمان نے زور دیا کہ مشرق وسطیٰ، بالخصوص خلیجی خطہ، اہم بین الاقوامی تجارتی راستوں کا مرکز ہے، اور یہاں جنگ کے بڑھنے سے نہ صرف علاقائی امن بلکہ عالمی معیشت بھی شدید متاثر ہو سکتی ہے۔

چین نے عالمی برادری پر زور دیا ہے کہ وہ موجودہ صورتحال کو مزید خراب ہونے سے روکنے کے لیے فوری اور سنجیدہ اقدامات کرے تاکہ خلیج میں کشیدگی کم کی جا سکے اور دنیا ایک نئے بحران سے محفوظ رہے۔

چینی بیان میں ایک بار پھر سیاسی مذاکرات اور سفارتی ذرائع سے مسائل کے حل پر زور دیا گیا ہے اور فریقین کو تلقین کی گئی ہے کہ وہ تحمل سے کام لیں اور خطے کے استحکام کو اولین ترجیح دیں۔