امریکی جریدے دی ڈپلومیٹ نے اپنی رپورٹ میں اعتراف کیا ہے کہ 2025 میں پاکستان کئی برسوں بعد دوبارہ عالمی توجہ کا مرکز بن گیا ہے۔ میگزین کے مطابق یہ سال پاکستان کے لیے اسٹریٹجک واپسی اور عسکری اعتماد کی بحالی کا اہم موڑ ثابت ہوا۔

میگزین کے مطابق پاکستانی عسکری قیادت نے ریاستی سطح پر انتہا پسندی کے خلاف واضح اور مضبوط پیغام دیا۔ رپورٹ میں کہا گیا کہ فیلڈ مارشل عاصم منیر نے دوٹوک مؤقف اختیار کیا کہ جہاد کے اعلان کا اختیار صرف ریاست کے پاس ہے۔

دی ڈپلومیٹ کے مطابق آرمی چیف کا یہ پیغام انتہا پسندی کے خلاف ایک اہم سنگِ میل قرار پایا، جبکہ 2025 میں پاکستانی عسکری قیادت نے ریاستی مفادات کے بھرپور تحفظ کے لیے مؤثر حکمتِ عملی اپنائی۔ رپورٹ میں کہا گیا کہ عسکری قیادت کے وژن سے ریاستی رٹ اور نظم و ضبط مضبوط ہوا۔

رپورٹ میں مزید کہا گیا کہ بھارت کے ساتھ حالیہ کشیدہ صورتحال میں پاکستان نے عالمی توجہ حاصل کی، اور پاکستانی افواج کی کارکردگی نے خطے میں عسکری توازن کو واضح کیا۔

میگزین کے مطابق افواجِ پاکستان نے بھارتی عسکری مہم جوئی کا مؤثر جواب دیا جس کے نتیجے میں ہندوستان کے واشنگٹن کے ساتھ تعلقات پر دباؤ بڑھا۔

دی ڈپلومیٹ نے مشرقِ وسطیٰ میں پاکستان کے دفاعی معاہدوں کو اسٹریٹجک پیشرفت قرار دیا اور بتایا کہ سعودی عرب کے ساتھ بڑا باہمی دفاعی معاہدہ طے پایا جس نے پاکستان کی اسٹریٹجک ساکھ اور ڈیٹرنس کو مزید تقویت فراہم کی ہے۔