ڈاکٹرعبدالقدیرخان کی آخری دستخط شدہ پٹیشن سماعت کیلئے مقرر
اسلام آباد ہائیکورٹ نے ینگ ڈاکٹرز کے حق میں ڈاکٹرعبدالقدیرخان کی آخری دستخط شدہ پٹیشن کل سماعت کے لیے مقرر کر دی ہے۔
درخواست میں پی ایم سی کے کنڈکٹ آف ایگزامنیشن ریگولیشن 2021 کو کاالعدم قرار دینے کی استدعا کی گئی ہے۔ جسٹس بابر ستار سماعت کریں گے ۔
وقاص ملک ایڈووکیٹ نے اسلام آباد ہائیکورٹ میں ڈاکٹر عبدالقدیر خان کی طرف سے دستخط شدہ پٹیشن خود دائر کی جس میں وفاق، سیکرٹری صحت، سیکرٹری داخلہ، پی ایم سی، سیکرٹری قانون و انصاف اور میڈیکل اینڈ ڈینٹل کونسل کو فریق بنایا گیا ہے۔
درخواست گزار کے مطابق احتجاج کرنے والے ینگ ڈاکٹرز پر پولیس کے لاٹھی چارج سے دنیا بھر میں ایٹمی پاکستان کا امیج خراب ہوا۔ طلبا کو مناسب وقت دیئے بغیر امتحان کا نیا سسٹم متعارف کرانا درست نہیں۔ آئین پاکستان کے تحت طلبا کو میرٹ پر اعلی تعلیم کی سہولت ملنی چاہئے۔
وقاص ملک ایڈووکیٹ نے عبدالقدیر خان کی درخواست ان کی وفات کے بعد خود دائر کی۔
درخواست میں کہا گیا ہے کہ انسانیت کی خدمت کا جذبہ رکھنے والے قوم کے مستقبل کے معماروں کے ساتھ سلوک پر افسردہ ہوں۔ پی ایم ڈی سی کو تحلیل کر کے پی ایم سی قائم کرنے سے خرابی پیدا ہوئی۔ سٹوڈنٹس کے لیے نیا ٹیسٹ متعارف کرا کے چھ ہزار روپے فیس وصول کی جا رہی ہے۔
ایک اندازے کے مطابق اس فیس سے 75 کروڑ روپے تک کی رقم اکٹھی کی جا رہی ہے۔ کمرشل اپروچ کو روک کر میرٹ پر سٹوڈنٹس کو پروموٹ کرنے کی پالیسی اپنائی جائے ۔
Comments are closed on this story.