بلوچستان کے ضلع نوشکی کے علاقے گلنگور میں چار افراد کی گولیاں لگی لاشیں برآمد ہوئی ہیں۔ لیویز فورس نے جائے وقوعہ پر پہنچ کر لاشوں کو اپنی تحویل میں لے کر ضابطے کی کارروائی کے لیے نوشکی ٹیچنگ اسپتال منتقل کر دیا ہے۔

اسپتال ذرائع کے مطابق مقتولین کی شناخت پنجاب کے رہائشیوں کے طور پر ہوئی ہے۔

بلوچستان: مسلح افراد نے 7 مسافروں کو بس سے اتار کر قتل کر دیا

ہلاک ہونے والوں میں دو افراد کا تعلق پاکپتن سے ہے جن کی شناخت معین ولد غلام مصطفیٰ اور حذیفہ ولد محمد لطیف کے نام سے ہوئی ہے۔ دیگر دو افراد عمران علی ولد مقصود احمد اور عرفان علی ولد مقصود احمد کا تعلق رحیم یار خان سے بتایا جا رہا ہے۔

لیویز حکام کا کہنا ہے کہ نامعلوم افراد نے ان افراد کو فائرنگ کا نشانہ بنایا۔ جائے وقوعہ سے شواہد اکھٹے کیے جا رہے ہیں اور علاقے کو گھیرے میں لے کر تفتیش کا دائرہ وسیع کر دیا گیا ہے۔

ایران میں 8 پاکستانیوں کا قتل

ابتدائی شواہد کے مطابق مقتولین کو فائرنگ یا ممکنہ تشدد کا نشانہ بنایا گیا ہے تاہم حتمی حقائق پوسٹ مارٹم رپورٹ کے بعد ہی سامنے آئیں گے۔ حکام کے مطابق واقعے کی وجوہات اور پس منظر جاننے کے لیے تحقیقات کا آغاز کر دیا گیا ہے۔

خیال رہے کہ بلوچستان میں حالیہ مہینوں میں پنجاب سے تعلق رکھنے والے مزدوروں، مسافروں اور سرکاری ملازمین کی ٹارگٹ کلنگ کے واقعات میں اضافہ دیکھا گیا ہے۔ زیادہ تر واقعات کی ذمہ داری کالعدم دہشتگرد تنظیم بلوچ لبریشن آرمی (بی ایل اے) نے قبول کی ہے۔