اسپیشل انویسٹمنٹ فسیلیٹیشن کونسل نے اپنے دوسرے سال میں پاکستان کے آئی ٹی اور ٹیلی کام سیکٹر کو نئی بلندیوں پر پہنچا دیا ہے۔ ملک کی ڈیجیٹل معیشت کو فروغ دینے کے لیے تاریخی اقدامات اٹھائے گئے، جن کے مثبت اثرات قومی و بین الاقوامی سطح پر نمایاں ہو رہے ہیں۔

ایس آئی ایف سی کی کاوشوں سے عالمی ٹیکنالوجی کی بڑی کمپنیاں جیسے گوگل، مائیکروسافٹ اور سیسکو پاکستان میں سرمایہ کاری کر رہی ہیں، جس سے ملکی آئی ٹی انڈسٹری میں انقلابی تبدیلیاں متوقع ہیں۔

پاکستان کی نوجوان نسل کو ڈیجیٹل ہنر سے آراستہ کرنے کے لیے 2 لاکھ یونیورسٹی گریجویٹس کو جدید آئی ٹی اسکلز ٹریننگ دینے کا منصوبہ کامیابی سے جاری ہے جس کا مقصد انہیں مقامی و عالمی روزگار کے قابل بنانا ہے۔

ایس آئی ایف سی کے تحت چین کے ساتھ ایک 5 سالہ ٹیکنالوجی اور اسکلز ٹرانسفر معاہدہ بھی کیا گیا ہے، جس سے صنعتی ترقی اور تکنیکی جدت کی نئی راہیں کھلیں گی۔

ڈیجیٹل معیشت کی بنیاد کو وسعت دینے کے لیے ملک بھر میں 10 ہزار ای روزگار مراکز قائم کیے جا رہے ہیں، جہاں ہر سال کم از کم 50 ہزار فری لانسرز کو سہولیات فراہم کی جائیں گی۔

معاشی ترقی کا تسلسل: ترسیلات زر 34.89 ارب ڈالر تک پہنچ گئیں

علاوہ ازیں فری لانسرز کے لیے ’پے پال‘ کے ذریعے آسان ادائیگیوں کا نظام اور بین الاقوامی لین دین کے لیے اسپیشل فارن کرنسی اکاؤنٹس کی سہولت متعارف کرائی گئی ہے۔

ایس آئی ایف سی کی سرپرستی میں پاکستانی اسٹارٹ اپس کو عالمی سطح پر متعارف کرایا جا رہا ہے، جہاں انہیں تجربے، سرمایہ کاری اور ایکسپوژر کے نئے مواقع میسر آ رہے ہیں۔